Dødsfall av hjartesjukdom på retur

Tala på død forårsaka av hjartesjukdom går stadig nedover i USA med det lågaste nivået i 2006 (199,4 per 100 000 innbyggarar). Mortaliteten sokk med 5,5 % frå 2005 (211,1 per 100 000). Dette viser tal frå Centers for Disease Control and Prevention (CDC). Trass i dette er hjartesjukdom framleis den viktigaste årsaka til død, ifølgje dr. Melonie P Heron (Division of Vital Statistics, CDC, Atlanta) og kollegaer.

Med unntak av 1993 har mortalitet på grunn av hjartesjukdom jamt og trutt gått nedover frå 1980. Tala viser at mørkhuda menn er mest utsette for hjartesjukdom, medan lyshuda kvinner verkar best beskytta. Desse skilnadene i forhold til kjønn og rase har minka dei siste åra.

Også fleire sjukdommar viste nedgang frå 2005 til 2006. Eksempel på dette er cerebrovaskulær sjukdom som gjekk ned med 6,4 %, diabetes mellitus ned med 5,3 % og essensiell hypertensjon og hypertensiv nyresjukdom, som gjekk ned med 5 %.

Presidenten i American Heart Assosiation (AHA), dr. Timothy J Gardner, meiner at denne nedgangen truleg er eit resultat av reduksjon av visse risikofaktorar. Dette gjeld spesielt mindre røyking. I tillegg har behandlinga av hjartesjukdom blitt meir effektiv. Ein tankevekkar er likevel at desse tala truleg vil bli reverserte dersom trenden med aukande overvekt og diabetes held fram. Dagens unge kan bli den første generasjonen som får eit kortare liv enn foreldra sine.

Les meir:
Medscape